श्रीगोदादेवी, भूदेवीको अंशको रूपमा श्री विल्लिपुत्तूर् क्षेत्रमा श्रीविष्णुचित्तसूरिको तुलसी वनमा उहाँकी प्रियपुत्रीकाे रूपमा प्रकट हुनुभएको थियो । कर्कट (श्रावण) मासको 'पूर्वफल्गुनी' उहाँको अवतारनक्षत्र हो । तमिल भाषामा 'कोदै' भनेर उहाँका पिता श्रीविष्णुचित्तसूरिले नामकरण गरिदिनुभयो । संस्कृत भाषामा भएका आकारान्त स्त्रीलिंगशब्दहरू तमिलमा ऐकारान्तका रूपमा परिणत

हुन्छन् । 'गोदा' शब्द, 'कोदै' भयो । एक एक वर्गमा यौटै अक्षर मात्र तमिलमा उपलब्ध छ । 'गोदै'लाई 'कोदै' भन्ने तमिलभाषाको व्यावहारिक उच्चारण हो । 'कोदै' शब्दको 'माला' भन्ने पनि अर्थ हुन्छ । प्रेमपूर्वक 'माला' भनेर श्रीविष्णुचित्तसूरिले बोलाउने गर्नुहुन्थ्यो । “गां ददातीति-गोदा" दिव्यप्रबन्धरूपी वाङ्माला प्रदान गर्नुभएको हुनाले 'गोदा' भन्ने नाम अन्वर्थ छ । बाल्यकालदेखि नै सहज भक्तिभावले युक्त श्रीगोदादेवीले शिरमा धारण गरेका मालाहरूलाई वटपत्रशायीप्रभुले स्वीकार गर्नुभयो । आफ्ना पितामा विद्यमान उत्तमगुण र संस्कारहरू गोदादेवीलाई सहज रूपमै प्राप्त हुँदै गए । अत्यद्भुत वेदान्तार्थले गर्भित २ वटा दिव्यप्रबन्धहरू गाएर उता ईश्वरलाई र यता जीवराशिलाई पनि आ-आफ्ना कर्तव्यहरू बोध गराएर यी गोदाम्बाले पूरै जगत्को आचार्यत्व वहन गरेको विधानै अतिविलक्षण छ ।।

आफ्नो तिरुप्पावै (श्रीव्रत) ग्रन्थद्वारा धनुर्मासव्रतको गोपीभावनाको साथमा स्वयंले आचरण गरेर लोकलाई राम्रो उपदेश दिनुभएकी यी माता श्रीगोदादेवीको औदार्य, आल्वार्हरूको भन्दा पनि अत्युत्तम छ । “तिरुप्पावै” ३० गाथाको ग्रन्थ हो । यो जगद्विदितै छ । दोस्रो उहाँको प्रबन्ध, "नाच्चियार्तिरुमोलि” नामले प्रसिद्ध छ । यसमा १४३ गाथाहरू छन् । अमृतरसभरित यी दुवै ग्रन्थहरू अत्यद्भुत वाङ्मयका

रूपमा दक्षिणभारतमा सम्मानित छन् । तिरुप्पावैप्रबन्धको अनुसन्धानमा तन्मय भएर रहने श्रीभगवद्रामानुजस्वामीजी, “तिरुप्पावैजीयर्” नामले लोकप्रसिद्ध हुनुभयो । श्रीकृष्णावतारको सौलभ्य र उहाँका बाल्यलीलाहरूलाई श्रीगोदादेवीले “नाच्चियार्तिरुमोलि” प्रबन्धमा प्रचुरमात्रामा वर्णन गर्नुभएको छ । तिरुमालिंरुशोलै, (वनाद्रि) वृन्दावन जस्ता दिव्य क्षेत्रहरूको वैभवलाई श्रीगोदादेवीले अतिसुन्दर ढंगले वर्णन गर्नुभएको छ ।।

श्रीआण्डाल्को तिरुनक्षत्रतनियन्-

कर्कटे पूर्वफल्गुन्यां तुलसीकाननोद्भवाम् ।

पाण्ड्ये विश्वम्भरां गोदां वन्दे श्रीरङ्गनायकीम् ।।

परिचय

अन्य आलवारहरू

• श्रीभक्ता‌ङ्घिरेणु (तोण्डरडिप्पोडियाल्वार्)
• सरोयोगी (पोय्कैआल्वार)
• भूतयोगी (पूदत्ताल्वार)
• महायोगी (पेयाल्वार)